Skrivað hevur Rói Joensen, Thursday, 09 July 2009 (1472 hits)
 Gomlu kempurnar reypaðu um gamlar dagar, og føroysku viðhaldsmenninir (og fimm viðhaldskonur) fóru so avgjørt ikki skuffaði til hús aftur. Legendudysturin og galladøgurðin á Hotel Føroyum saman við legendarisku leikarunum vóru av sonnum eitt stórt upplivilsi.
At eg nakrantíð skuldi koma at sita til borðs saman við Phil Neal hevði eg forsvorið. Men so var á Hotel Føroyum leygarkvøldið. Maðurin, ið spældi 650 dystir fyri Liverpool harav 417 á rað, kom og setti seg við okkara borð, tá ið Liverpool-Legendurnar umsíður komu til borðs. Við átta enskum meistaraheitum og fýra evropeiskum meistaraheitum, er hann eisini mest vinnandi leikarin í søguni hjá Liverpool, leygarkvøldið. Og tað gjørdist so sanniliga eitt áhugavert borðhald, har Phil Neal brilleraði við at siga søgur um gamlar dagur og erligar meinginar um alt sum fyriferst í Liverpool FC. Meiri um borðhaldið seinni í greinini. (les meira) Á myndini Eirikur Rasmussen strálaði sum ein sól, nú hann slapp at vera so nær við hetjurnar, sum hann minnist so væl frá 70- og 80 árunum.
Ein minniligur dagur
Leygardagurin 4. juli 2009 fer altíð at standa í minninum, sum ein heilt serligur dagur. Liverpool Føroyar skipaði saman við North Atlantic Football Agency og Jákup í Stórustovu fyri dysti millum Liverpool Legends og Føroyar Legends.
Tiltakið byrjaði í bowlinghøllini kl. 16.00. Føroyskir fjepparar møttu gomlu kempunum úr Liverpool, fingu autografar, og annars bara hugnaðu sær við onkrum góðum áðrenn sjálvan dystin.
Klokkan 19.00 byrjaði sjálvur dysturin millum legendurnar og føroyska liðið, sum í høvuðsheitum var mannað við Landskronahetjum forstyrkt við nøkrum svornum Liverpool fjepparum. 
Reinhard í essinum
Spentast av øllum undan dystinum, mundi verða Reinhard Dam, sum hevði vunnið møguleikan at sleppa at spæla við Liverpool legends. Í einari reyðari troyggju við “Babb” á rygginum gjørdi Reinhard seg kláran til dystin, og tað var ikki sørt, at Phil Thomson, útskiftingsleiðari hjá Liverpool, var spentur at síggja hendan spelkna fýrin. Men fyri fyrst mátti Reinhard á beinkin.
Undan dystinum vóru You’ll never walk alone og Tú altfagra land mítt sungnir, og so var farið í gongd. Ferðin var sjálvandi ikki tann stóra, men dysturin varð tikin í ramasta álvara, tí fyrrverandi fótbóltsleikarar vilja altíð vinna.
Hóast Liverpool Legends vóru nógv eldri enn føroysku leikararnir, so gjørdi framúr bóltførleikin hjá gomlu kempunum, at hesin aldursmunir var ringur at fáa eyga á. Ein maður sum Alan Kennedy spældi samfullar 70 minuttir, hóast hann í dag er 57 ára gamal.
Tað gekk ikki so leingi, so hevði tvøroymaðurin Hendrik Thomsen lagt føroyska liðið fram um. Men longu fyri steðgin høvdu John Durnin (haldi eg) og Ian Rush lagt Liverpool fram um.
Spenti føroyingurin Reinhard Dam kom eisini á vøllin og spældi einar 20 minuttir. Evnini vóru kanska ikki tey, sum Phil Thomson hevði droymt um. Men Reinhard hevði eina góða løtu og brilleraði millum annað við einari næsatemjing og einum hælsparki.
Reinhard mátti eftir hálvleikssteðgin staðfesta at hansara minuttir í Liverpool-troyggjuni vóru taldir, og Thompson gav honum ongan sáttmála á hesum sinni. Ein uggi var kortini, at Thompson hevði lovað at senda eitt sjónband til Benitez, so hvør veit?
Í seinna hálvleiki varð einki mál skorað, og kanska kundu Liverpool legendurnar takka fyri, at fanatiski Liverpool-fjepparin Jóhan Carl Dam var dómari hendan dagin, tí einaferð tók hann sakina í egnar hendur og dømdi fyri rangstøðu, hóast hjálpardómarin Sólbjørn Mortensen, ikki lyfti flagginum.
Eisini kom, eg loyvið mær at siga, Føroya størsti Liverpool-viðhaldsmaður, Eirkur Rasmussen á vøllin í seinna hálvleiki, og hann tyktist at njóta løtuna.
Eftir dystin var lagið gott. Børnini vildu sum vera man hava autografar, og serliga var eftirspurningur eftir Ian Rush, og gamli stórskjúttin skuffaði ikki. Eisini Allan Kennedy gav sær eisini góða tíð at tosa við dreingirnar, sum hann hevði vant á fótbóltsskúlanum dagarnar undan.
Nógv reyp
So var tíðin komin hjá okkum stóru smádreingjum at fara niðan á Hotel Føroyar at eta ein góðan bita og hitta gomlu kempurnar.
Sum áður nevnt, so gjørdist hetta ein minnilig løta. Okkara borðharri, Phil Neal, var bæði fyrikomandi og prátingarsamur. Serliga fortaldi hann nógvar góðar søgur um teir gomlu dagarnar. Hóast hann kom til Liverpool sama ár, sum Shankly gavst, so fyltu søgurnar um Shanks nógv hetta kvøldið.
Phil Neal segði heilt einfalt, at tað var Shanks fyri at takka, at Liverpool ikki bara er eitt vanligt felag í Onglandi. Neal segði eisini, hvussu stórt trýstið var á Bob Paisley fyrstu tíðina sum venjari, og at tað var ein øgiligur lætti hjá honum tá ið meistaraheitið og UEFA-cup vóru vunnin í 1976.
Phil Neal býr framvegis í Liverpool í somu gøtu sum Steven Gerrard.
- Míni hús eru ikki størri enn hansara garaga, men tað er so tað, segði Neal.
Fyrrverandi leikararnir og núverandi leikararnir plaga ofta at spæla golf saman, so Phil Neal hevur eina góðan føling við, hvat fyriferst í Liverpool FC. Hann svaraði øllum spurningum, og um hann skuldi velja, so vildi hann heldur hava Alonso í felagnum enn Mascherano, og hann segði eisini, at tað vildi onkur av teimum promintentu leikarunum eisini.
Fyri at runda Phil Neal av, so endaði hann við sínari favorit søgu um Shanks.
Málverjin, Tommy Lawrence, við kelinavninum, The flying Pig, hevði einaferð gjørt ein brølara, og nærum mist bóltin millum beinini. Komnir í umklæðingarúmið í hálvleikinum, skundanði Lawrence sær at siga, at hann skuldi ikki havt gleivað.
- Tað skuldi mamma tín heldur ikki havt gjørt fyri nøkrum árum síðan, var skjóta aftursvarið frá Shanks, og so var Lawrence bankaður upp á pláss.
Kennedy og Thompson
Við onnur borð sótu aðrar kempur og reypaðu. Beint aftanfyri okkum, sótu gapandi menn og lurtaðu eftir Phil Thompson, sum ikki stóð aftanfyri Neal í reypið. M.a. segði hann, at tað vóru Gerrard, Owen (orsaka eg banni), Carragher og Murphy, sum fóru til leiðsluna og fingu Houllier og hann frá. Men Thompson segði seg ikki hava agg til teir fyri tað.
Tvær røður vóru hildnar. Fyrst fór tann altíð fryntligi Alan Kennedy á pallin at reypa. Sambært Phil Neal, so var Kennedy smaðin fyrr, men tað kann bara staðfestast, at tað var farð av honum. Serliga var stuttligt at hoyra, tá ið hann greiddi frá málinum í finaluni móti Real Madrid í París í 1981. Hann gjørdist nærum ræðslusligin tá ið hann kom fram um miðjuna, tí har hevði hann sjáldan verið fyrr. Men helt bara leiðina fram inn í brotsteigin, og endaði við at buldrað bóltin í málið úr spíðskum vinkli. (Síggj málið á Youtube).
Eisini fortaldi hann um seinasta brotssparkið í 1984 móti Roma í Roma.(Síggj brotssparkskappingina á Youtube)
So var túrurin komin til Phil Thompson, og hann brúkti stóran part av síni tíð, at tosa um stóru nøs sína, og kelinavnið Pinocchio.
M.a. greiddi hann frá, at fyrsta viðmerkingin hjá Shanks, tá ið hann kom til Liverpool var.
- Tú drongur mást hava logið nakað forbannað illa, sum smádrongur.
Grobbelar er tann sami
Borðhaldið endaði við, at Bruce Grobbelar vegnað Liverpool Føroyar og North Atlantic Football Agency handaði Barnaheiminum ein kekk á 40.000 krónur.
Grobbelar var akkurát tann sama at síggja til, sum tá ið hann plagdið at skapa sær á vøllinum í gomlum døgum. Hann fekk eisini allar Legendurnar upp á pallin at syngja You’ll never walk alone saman við okkum. Tá var lagið gott og tað mundi hoyrast oman í Havnina, so hart sungu menn, og tær 5 kvinnurnar.
Eftir borðhaldið gingu menn runt og prátaðu við legendurnar. Tað vóru jólaljós í eygunum á monnum, og Eirikur Rasmussen strálaði sum ein sól, nú hann slapp at vera so nær við hetjurnar, sum hann minnist so væl frá 70- og 80 árunum.
Samanumtikið eitt fantastiskt kvøld, og Liverpool Føroyar og NAFA skulu hava stóra tøkk fyri tað. Og so er bara at vóna, at tikið verður av møguleikanum at fáa legendurnar og fótbóltsskúlan aftur til Føroya, um nøkur fá ár. Eg verið so í øllum førum aftur til galladøgurða, um so skuldi verið.
You’ll never walk alone
Viðmerkingar () |
|
|
|
|
 |
Greinir 
