Skrivað hevur Rói Joensen, Thursday, 21 January 2010 (630 hits)
 (PL) Liverpool – Tottenham 2-0 (1-0)
Endiliga spældi Liverpool ein góðan dyst aftur. Vit vunnu uppiborið 2-0 og kundu væl havt vunnið meira. Kuyt legði Liverpool fram um eftir seks minuttir.
Hóast Tottenham til tíðir hevði bóltin nógv, so hóttu teir sjáldan málið hjá Reina. Hinvegin hevði Liverpool eina rúgvu av møguleikum at økja, og tað luktaði brent á Anfield móti endanum. Í yvirtíðin staðfesti Kuyt sigurin við einum brotssparki, sum mátti takast tvær ferðir, áðrenn vit endiliga kundu frøast um ein góðan arbeiðssigur.
Gerið viðmerkingar til dystin inni í greinini.
Langt síðan hevur verið so hugaligt at skriva um ein dyst hjá okkara kæra Liverpool. Vit skulu væl aftur til dystin móti Scum í heyst fyri at finna ein dyst har Liverpool hevur spælt og serliga stríðst eins væl og í kvøld.
Poleraður fótbóltur var tað ikki. Men allir mans stríddust manniliga, og Tottenham var meginpartin av dystinum fyri so at siga ongum í offensiva spælinum.
Havandi í huga, at vit manglaðu meginpartin av skapandi leikarunum á liðnum, var einasti møguleikin at stríðast, og tað gjørdu okkara menn sanniliga.
Avgerandi fyri sigurin var, at vit vunnu miðvøllin. Lucas og serliga Mascherano stríddust manniliga, og teir dugdu eisini betri enn leingi sæð at fáa eitt sindur av ferð á mótálopini í staðin fyri at digga ov leingi við bóltinum.
Tað var eisini avgerandi, at Aquilani langt um leingi spældi ein góðan dyst fyri Liverpool. Hann spældi hangandi áloypari beint aftanfyri Kuyt og var við í uppbyggjandi spælinum í fleiri vandamiklum álopum, og so sóu vit eisini, at hann saktans klárar seg í harða enska spælistílinum. Nakra ferðir sóu vit kortini, at hann ikki ordiliga hevur vant seg við leikferðina í Onglandi enn, og misti tíð nakrar óneyðugar bóltar.
Fyrsta málið kom eftir, at Aquilani prikaði bóltin víðari til Kuyt í einum mótálopi, og niðurlendingurin, sum hevur spælt alt annað enn væl seinastu mongu dystirnar, sendi eitt flatt langskot í málið.
Tottenham hevði bóltin nógv meginpartin av tí, ið eftir var av fyrra hálvleiki, men verjan og sentrali miðvøllurin stríddust manniliga, og Tottenham megnaði ikki at hótta málið.
Beint fyri hálvleik kom Liverpool eitt sindur fyri seg, og eftir eitt hornaspark mundi fyrst Kuyt og síðan Skrtel skorað.
Tað skal eisini sigast, at Modric hevði eina góða roynd á okkara mál beint fyri steðgin, men Reina bjargaði.
Tottenham byrjaði betri eftir steðgin, og Defoe hevði bóltin í málinum, eftir at Kyrgiakos spældi ein truplan bólt til Reina, sum varð trýstur so mikið av Defoe, at Tottenham-leikarin vann bóltin og trillaði hann í tóma málið. Tíbetur veitraði linjudómarin fyri rangstøðu, ella kanska var tað frísparki til Reina, og vit sluppu við hvøkkinum.
Liverpool kom eftir hetta skjótt fyri seg, og hevði nógv betri tamarhald á støðuni enn fyri steðgin. Riera skallaði einki minni enn eitt flott innlegg frá Carragher á yvirleggjaran.
So við og við fekk Liverpool eisini fleiri góðar møguleikar at avgera dystin, men allir vóru misbrúktir. Degen gjørdist púra leysur eftir í skjótt mótálop, men hann valdi skeivu loysnina at spæla tvørturum til Kuyt, tá ið hann skuldi havt skotið, og so hvarv tann møguleikin.
uyt, Kyrgiakos og innskifti N’Gog høvdu eisini góðar royndir, men inn vildi bólturin ikki, og so mundu øll viðhaldsfólk veruliga stúra fyri, at vit enn einaferð fóru at missa á stokkinum, sum vit hava gjørt so ofta í ár.Tíbetur hendi tað ikki, og í yvirtíðini varð N’Gog feldur inni í brotsteiginum, og hóast hann sparkaði bóltin rættiliga langt frá sær, og undirritaði í fyrsta umfari ikki helt tað verða brotsspark, so bríkslaði dómarin, og tað var nokk eisini rætt.
Kuyt skoraði trygt, men dómarin dømdi umspark, tí fleiri leikarar vóru inni í brotsteiginum, áðrenn skotið varð. Kuyt skoraði eisini trygt aðru ferð og so var frøin stór.
Hendan dystin riggaði meira enn leingi. Sjálvt Carragher spældi væl á høgra bakki bæði í verjupartinum og rættiliga sjáldsamt eisini í álopspartinum. Øll verjan stóð eisini væl, og Kyrgiakos, sum eg ikki havi hildið nógv um, spældi annan dystin á rað ein sera góðan dyst.
Veikasti parturin á liðnum mundi vera vinstra síða, har Insua og Riera høvdu tað trupult í verjupartinum. Riera gav tó sítt í álopsspælinum við sínum óortidoksa spælistíli.
Mitt á miðjuni skaraði Mascherano burturúr og Lucas spældi eisini ein góðan dyst.
Heilt frammi spældu Aquilani og Kuyt bara heilt væl, sum avloysarar fyri Torres og Gerrard. Gott at síggja Kuyt’in spæla væl aftur, tí hann dugir at skora mál, og tað eru tað ikki akkurát so nógvir sum gera, tá ið Gerrard, Benayoun, Torres og Johnson eru skaddir. Fótbóltur ræður jú um at skora mál!
Ein góður sigur, men nú mugu vit ikki fara upp at flúgva av trimum søtum stigum. Kappingarárið er hóast alt framvegis ein katastrofa, sum ikki veruliga kann bjargast.
Fjórða plássið er munandi lættari at røkka eftir kvøldsins sigur, men enn skulu vit fram um trý lið, og tað verður als ikki lætt. Týskvøldið 26. Januar skulu trý stíg heim við aftur úr Wolverhampton, um vit skulu byrja at tosa um veruliga framgongd hjá Liverpool.
(PL) Liverpool – Tottenham 2-0 (1-0)
1-0 Kuyt 6
2-0 Kuyt 92
Dystartøl frá The Times:
Liverpool (4-4-1-1): J M Reina — J Carragher, M Skrtel, S Kyrgiakos, E Insúa — P Degen (sub: S Darby, 90min), J Mascherano, Lucas Leiva, A Riera (sub: M Rodríguez, 81) — A Aquilani (sub: D Ngog, 79) — D Kuyt.
Substitutes not used: D Cavalieri, J Spearing, R Babel, D Pacheco.
Booked: Mascherano, Lucas.
Tottenham Hotspur (4-4-2): H Gomes — V Corluka (sub: A Hutton, 62), M Dawson, L King (sub: S Bassong, 81), G Bale — L Modric, W Palacios, J Jenas, N Kranjcar (sub: R Keane, 65) — P Crouch, J Defoe.
Substitutes not used: B Alnwick, D Rose, Giovani dos Santos, R Pavlyuchenko.
Booked: Jenas, Bale, Palacios.
Referee: H Webb.
Hagtøl frá Sky Sports:
Liverpool - Tottenham Hotspur
2 Goals 0
1 1st Half Goals 0
5 Shots on Target 3
8 Shots off Target 2
1 Blocked Shots 5
2 Corners 3
11 Fouls 17
2 Offsides 5
2 Yellow Cards 3
0 Red Cards 0
61.8 Passing Success 73.2
28 Tackles 21
64.3 Tackles Success 76.2
45.1 Possession 54.9
54.4 Territorial Advantage 45.6
Leikaramet:
Reina 7 (Nakrar góðar bjargingar)
Carragher 8 (Nøkur super innlegg av høgra bakki, tað er ikki ofta)
Kyrgiakos 8 (Stríddist, sum ein annar sjóðrænari)
Skrtel 7 (Besti dystur hetta kappingarárið)
Insua 6 (Eitt sindur ósjónligur)
Lucas 7 (Fínur dystur)
Mascherano 8 ( Gekk á odda at vinna miðvøllin)
Degen 6 (Byrjar at vísa okkurt)
Aquilani 7 (Vónandi var hetta byrjanin til nakað gott)
Riera 6 (Góður í álopspartinum, men røkkur akkurát ikki 7- talinum)
Kuyt 8 (Bestur í leingi, skorar bæði málini og burdi havt skorað okkurt afturat)
N’Gog 8 (Kom sera væl frá teimum 15 minuttunum)
Rodriguez 6 (Lítla spælitíð)
Darby (Veit ikki um, hann nært við bóltin)
Viðmerkingar () |
|
|
|
|
 |
Tíðindi 
