Skrivað hevur Rói Joensen, Thursday, 11 March 2010 (502 hits)
 (EL) Lille - Liverpool 0-1 (0-0)
Liverpool megnaði ikki at reisa seg eftir píniliga ósigurin fyri Wigan mánadagin. Í einum hampiliga jøvnum dysti, endaði alt við, at Lille fekk eitt klodda frísparksmál, sum Reina og verjan mugu taka á sín kappa. Leikliga var lítil framgongd at hóma, tó at tað var eitt vet frægari enn móti Wigan, fyrr var illa. Og Rafa var væl nøgdur?!?!
1-0 ber tó saktans til at venda á Anfield, men so mugu aðrir bollar í súpanina.
Gerið viðmerkingar inni í greinini
So siti eg aftur her við knappaborðið eftir enn ein skuffandi dyst hjá Liverpool. Tó skuffilsið er kanska ikki so stórt, sum tað var fyrr á kappingarárinum, tí tað tíverri vorðið soleiðis, at tað ikki akkurát er óvæntað, at okkara kæra lið skuffar okkum.
Hetta skuldi vera dysturin, tá ið Liverpool skuldi reisa seg aftur eftir ósigurin fyri Wigan, tá ið Rafa eftir dystin sambært sær sjálvum var so illur sum sjáldan áður.
Tíverri fekk hann einki aftursvar frá leikarunum, og niðurstøðan hjá mær og flestu miðlum er eisini, at Liverpool enn einaferð skuffaði stórt.
Onkur nevndi á kjakinum á liverpool.fo í dag, at skjótt fór Rafa ikki at hava fleiri umberingar eftir, og okkurt bendir á viðkomandi er um at fáa rætt. Tí Rafa hevði ongar umberingar eftir dystin. Í staðin rósti hann á tíðindafundinum, so ótrúligt tað ljóðar, sínum leikarum fyri góðan vilja. Serliga var Rafa nøgdur við seinna hálvleik. So vítt eg minnist, hevði Liverpool ongan veruligan møguleika í seinna hálvleiki????? Jú, Babel hevði vist eitt gott skot.
Lesið alla samrøðuna á liverpool.no
Um dystin er at siga, at hetta var enn ein av hesum keðiligu fótbóltsdystunum, sum Liverpool spælir alt ov nógvar av. Nærum einki samanhangandi spæl, og framvegis null kreativitetur á miðvøllinum (onkur kallar hetta antifótbóltur, og tað er ikki einki um tað). Tað fær heldur ikki verið øðrvísi við Lucas og Mascherano mitt á miðjuni, og tá ið so Gerrard og Kuyt nærum ikki duga at spæla bólt fyri tíðina, so er vónleyst.
Álopsfótbólturin, sum Rafa fekk at rigga so væl seinasta kappingarár, er fullkomiliga druknaður í óáhugaverdum verjufótbólti
Liverpool hevði tveir veruligar møguleikar í dystinum, báðar fyri steðgin. Fyrst spældu Torres og Babel væl saman, og endin varð, at Babel gjørdist leysur og átti at havt skorað, men málverjin bjargaði.
Hin møguleikan fekk Torres beint fyri steðgin. Fyrst var eitt fríspark frá Gerrard bjargað. Bólturin støkk út til Johnson í høgru síðu, og hann legði innfyri, og har skallaði Torres móti málinum, men aftur bjargaði málverjin.
Í seinna hálvleiki fór Liverpool bara longri og longri aftur á vøllin, og sum so ofta fyrr tá ið farið verður eftir at verja seg til ein javnleik, so endaði tað við ósigri.
Seks minuttir fyri tíð sendi Hazard eitt fríspark innfyri , og tað skrúvaði inn við handaru stong. Reina og verjan sóu ikki ov gott út í støðuni.
Í yvirtíðina rakti Lille stongina við einum dundur skoti, men vit sluppu við hvøkkinum.
Millum frægastu leikarar í kvøld var Babel, men hann var sjálvandi tikin út. Tað er jú vandamikið at byggja sjálvsálitið upp hjá álopsleikarunum.
Aquilani, sum móti Wigan í 20 minuttir spældi tað besta, hann hevur víst fyri Liverpool, slapp sjálvandi heldur ikki at byggja víðari upp á sjálvsálitið, og sat á beinkinum allar 90 minuttirnar.
Hóast vit taptu, so skuldi borið til at vent 1-0-ósigrinum á Anfield. So úrslitið er kanska til at liva við. Men halt kjaft vit spæla illa fyri tíðina, og tað er reyvkeðiligt at hyggja eftir.
Nú kann ikki mangla nógv til Rafa finnur hurðina á Anfield. Hetta kann ikki halda fram, og tað ber ikki til í allar ævir, at vera friðaður, bara tí amerikonsku eigararnir er fullkomiliga óbrúkiligir.
Dystartøl:
(EL) Lille - Liverpool 0-1 (0-0)
1-0 Hazard (84)
Lille (4-1-2-2-1): M Landreau - F Beria, A Chedjou, A Rami, Emerson - R Mavuba - F Balmont, Y Cabaye (sub: S Dumont, 73min) - E Hazard, L Obraniak (sub: L Touré, 83) - P-A Frau (sub: P-E Aubameyang, 77). Substitutes not used: L Butelle, J Vandam, P Souare, A Souquet. Booked: Aubameyang, Touré.
Liverpool (4-2-3-1): J M Reina - G Johnson, J Carragher, D Agger, E Insúa - Lucas Leiva, J Mascherano - D Kuyt (sub: N El Zhar, 88), S Gerrard, R Babel (sub: A Riera, 73) - F Torres. Substitutes not used: D Cavalieri, S Kyrgiakos, M Kelly, A Aquilani, D Ngog. Booked: Insúa, Torres.
Referee: C B Larsen (Denmark).
Viðmerkingar () |
|
|
|
|
 |
Tíðindi 
