Skrivað hevur Rói Joensen, Friday, 04 June 2010 (2296 hits)
 Sum øllum kunnugt, varð Rafael Benitez í gjár koyrdur frá
sum venjari hjá okkara kæra felagi Liverpool. Eg fari her, at gera eitt
lítið
eftirmæli, um hansara tíð í Liverpool, og eisini at koma við einum
boðið, hvat
skal henda nú?
Gerið viðmerkingar til støðuna í Liverpool inni í greinini.
Tað var ikki akkurát væntað, at Rafa fór at verða koyrdur beint
nú. Alt bendi á, at hann fekk eitt ár afturat í Liverpool. Men fyrrakvøldið
komu fyrst The Times og so Sky Sports News við tíðindum um, at Liverpool royndi
at fáa eina semju við Rafa, um at enda samstarvið. Í gjár tann 3. juni gjørdist
so greitt, at Rafael Benitez ikki er venjari hjá Liverpool longur.
Tað má metast at vera eitt sindur løgið, at Liverpool bíðar
til nú, at senda Rafa til hús. Tað hevði givið felagnum nógv betri tíð at finna
nýggjan venjara, um hann varð koyrdur beint eftir kappingarárið endaði, tá ið
hann nú kortini skuldi koyrast.
Hvat koma vit so at minnast Rafa fyri? Jú, fyrst og fremst,
at hann fyrsta árið sum venjari førdi Liverpool til sigurs í minniligu
Champions League finaluni í Istanbul. Taktikkarin Rafael Benitez hevði longu
fyrsta árið víst seg sum ein sannan taktiskan vinnara í Evropa, og Liverpool
hevur undir hansara leiðslu verið tiltikið fyri at staðið seg væl í Evropa.
Í 2006 eydnaðist eisini at vinna finaluna í FA-cup á West
Ham. So Rafa byrjaði við tveimum steypum upp á tvey ár, og hann vann hjørtuni á
flestu Liverpool-fjepparum.
Hinvegin so hevur ikki eydnast honum at fáa Liverpool heilt
upp í oddin í Premier League. Kappingarárið 2008/2009 var nær við , men hetta
seinasta kappingarárið gjørdist tað vánaligasta í Premier League síðan fyrsta
árið hjá Houllier í 1998/1999.
Kritikarar hava eisini havt at Rafa fyri at prioritera
Champions League fram um Premier League. Hansara rotatiónspolitikkur sýntist at
vera soleiðis hættaður, at sterkasta liðið spældi í Evropa, meðan eykamenninir
í størri mun spældu heima í Onglandi.
Eitt annað, sum Rafa hevur verið kritiseraður fyri, er
hansara verjukendi spælistílur. Hesum kritikki eri eg fyri stóran part samdur í,
tí mangan var tað altso ikki serliga stuttligt at síggja Liverpool liggja langt
afturi á vøllinum og verja móti botnliðum í Premier League. So leingi sum tað
gekst hampiligt, bar illa til at finnast at verjukenda spælinum. Men tá ið tað gekst
sum seinasta kappingarár við vánaligum úrslitum og verjukendum spæli, so misti
eg og nógv onnur tolið.
Liverpool man vera einasta topplið í Evropa seinnu árini,
sum hevur spælt við tveimum verjukendum leikarum, Mascherano og Lucas, mitt á
miðjuni (vita tit nakað?), og skapandi evnini á liðnum vóru hareftir. Tá ið so bara ein áloypari,
Torres var í hópinum, og hann ofta var skaddur, so var liðið næstan tannleyst. Seinastu
mánaðirnar av kappingarárinum gjørdist mær greitt, at Liverpool mátti skifta
venjara fyri at koma víðari.
Seinasta kappingarárið hjá Rafa var eitt sindur av einari
gátu. Tí kappingarárið undan, spældi Liverpool tann besta fótbóltin í longri
tíðir, kanska heilt síðan seinasta meistaraheitið í 1990. Serliga á várið 2009
spældu Rafa'sa menn sum einglar. Álopsspælið koyrdi bara við one-touch
sendingum, og hóast tað kostaði í hinum endanum viðhvørt, so skoraði Liverpool
so mikið nógv mál, at Liverpool vann 10 og spældi ein javnan dyst seinastu 11 dystirnar
í Premier League.
Alt sá tí gott út til kappingarárið 2009/2010. Hetta
broyttist nakað, tá ið eftir mínum tykki besti leikari í 2008/2009, Xabi Alonso,
var seldur.
Glenn Johnson kom til felagið fyri £17,500,000. Alt gott um
tað, men hinvegin, so var tað ein katastrofa, at spanski landsliðsleikarin,
Arbeloa, varð seldur fyri Bara £3,500,000 (Dossena fór fyri £4,700,000). Arbeloa og Johnson kunnu væl metast
at vera nøkulunda eins góðir. Johnson heldur betri frameftir vøllinum og
Arbeloa heldur betri í verjupartinum. Men at brúka £14,000,000 til hesa
broyting, tað var spill av sera dýrabarum peningi.
Eg hevði kortini ikki væntað, at saknurin í Alonso fór at
verða so stórur, sum hann gjørdist. Avloysarin, sum Rafa keypti seinasta summar,
Aquilani, var skaddur heilt fram til jóla, og tá ið Aquilani gjørdist klárur, valdi
Rafa kortini framhaldandi at hava álit á Mascherano og Lucas mitt á miðjuni.
Úrslitið kenna vit. Útslignir í bólkaspælinum í Champions League og vánalig
úrslit í øllum kappingunum heima í Onglandi. Í Evropa League gekst væl, men
hvør leggur í tað? Og tað gjørdist heldur ikki nokk til at bjarga Rafa í
Liverpool.
Rafa hevur ikki havt bestu umstøðurnar at arbeiða undir
undir amerikonsku eigarunum, og fleiri halda, at eingin annar enn Rafa hevði
megnað at fingið so frægt burtur úr støðuni. Onnur siga, at Rafa hevur brúkt
líka nógvar pengar sum venjararnir hjá hinum toppliðunum í Onglandi, og meta
tí, at hann hevur duga sera illa at keypt inn. Eg skal ikki siga hvør hevur
rætt, men kann bara endurgeva "facts", at Rafa hevur selt 69 leikarar fyri £155,700,000
og keypt 57 leikarar fyri £230,676,000, hetta er sambært síðuni www.fchistory.net.
Ná, nú er Rafa farin. Summi halda hetta var tað rætta at
gera, meðan onnur eru ill og skuffaði, tí tey hildu, at Rafa var rætti maðurin.
M.a. mótmælti felagsskapurin Spirit of Shankly uttanfyri Anfield í gjárkvøldið.
Allar okkara legendur verða sjálvandi eisini spurdir um teirra meining og eru
líka ymiskir á málið sum øllum onnur. Eitt tykist tó greitt. Tað er, at tey
flestu halda, at Rafa kann vera errin av síni tíð í Liverpool, og serliga
verður sigurin í Istanbul nevndur.
Eg haldi, at tíðan hjá Rafa nú var farin. Men hann kemur
kortini altíð at standa eftir í søguni hjá Liverpool fyri sigurin Champions
League 2005. Hann førdi eisini Liverpool nær at meistaraheitinum, men so kolapsaði
alt, og tað var sera torført at síggja, hvussu Rafa skuldi lyfta liðið upp
aftur. Hetta helt leiðslan í felagnum eisini, og sendi Rafa til hús.
Og hvat skal so henda? Ja, tað er ein góður spurningur. Ein
nýggjur venjari skal sjálvandi finnast sum skjótast, og bookmakararnir eru
langt síðan farnir at geva síni boð upp á okkara nýggja venjara. Martin O'Neil,
Roy Hogdson og sjálvasti Kenny Dalglish vera mettir sum bestu boðini.
Fyri seks árum síðan, vónaði eg, at Martin O'Neil fór at
gerast okkara venjari, og tað geri eg eisini hesaferð. Vit treingja til ein
lívligan motiverandi venjara, og tað fáa vit í hvussu er við Martin O'Neil, sum
hevur staðið seg væl allastaðni, hann hevur verið.
Eg eri eitt sindur meira ivasamur við Roy Hodgson, men hvør
veit, tí í Fulham hevur hann í hvussu er gjørt undirverk.
Eg havi eisini fult álit at King Kenny, um tað óvæntaða
skuldi hent, at hann aftur settist í venjarasessin. Hann er ein vinnari í odd
og egg, og hóast fótbólturin er nakað broyttur, síðan hann gavst sum venjari í
2000, so ivist eg ikki í, at hann kennir spælið og felagið Liverpool so væl, at
hann megnar uppgávuna. Hann hevur í hvussu er álit millum allar veruligar
Liverpool-fjepparar. Eitt annað boð er, at King Kenny tekur ábyrgdina, meðan
leitað verður eftir einum varandi avloysara fyri Rafa.
Aðrir venjarar, sum eru nevndir, eru m.a. Gus Hiddink, Mark Huges, Jurgen Klinsmann, Laurent Blanc, Louis van Gaal og eisini Sammy Lee.
Tað er so vist, at tað er spennandi, hvør skal venja okkara
menn. Og avgerðin kann eisini gerast sera týðandi fyri framtíðina hjá felagnum
Liverpool.
Og høvdu vit, so bara fingið nýggjar eigarar, so fór kanska
á lýsna ordiliga.
At enda vil eg bara takka Rafael Benitez fyri tíðina í Liverpool,
og sum hann sjálvur segði í gjár, so skulu vit altíð minnast til, "Yol'll never
walk alone".
Viðmerkingar () |
|
|
|
|
 |
Tíðindi 
